現年36歲嘅阮民安（Tommy）做咗老竇！去年被爆同張倚雯（Eva）奉子成婚，原來B仔喺上周五已經出世。Eva喺社交網貼相留言：「順產7磅幾的B仔！二人出門三人回家，感覺好奇妙haha！生仔十級痛果然名不虛傳，來回地獄也值得！」BB肥肥白白又多頭髮，同老竇餅印一樣。
噚日致電Tommy仔恭喜，但佢堅持將屋企事低調，只講Eva做咗媽媽，佢話：「母子平安，聽醫生講算重B，Eva都會餵人奶。」問到老婆係咪生得好辛苦？Tommy話：「因為佢係第一胎，要到適當度數BB先可以出世，真係等好耐痛好耐！肯為另一半生BB嘅女士，真係非常之偉大，每一個男士都應該好好錫太太，因為呢個過程好辛苦。」
成身毛改名Caesar
問到B仔改咗名未？Tommy話：「聽講BB中文名未改，英文名叫Caesar，即係凱撒，因為佢成身都係毛，所以諗起《猿人爭霸戰》猩猩男主角，古羅馬帝國又有英雄人物凱撒大帝，花名可能叫大帝。」Tommy仲讚BB好腳頭：「2017年E-Kids第一次開賣飛演唱會，今時今日市道可以賣爆，呢個係奇蹟，而年尾E-Kids再開騷，今次可能唔止一場，佢真係幸運小寶寶，希望佢健健康康、符符碌碌、開開心心，盡量享受人生。」
撰文：馮仁昭