方嘉柏馬房「澤心星」列陣本周三(22日)快活谷第六場四班1200米，今朝由出賽騎師何澤堯親自加課操練，在內圈快踱兩圈，亦係何澤堯今期5匹座騎中，唯一一匹賽前一日由佢自己出試，可見備受重視。晨操專家積奇指「澤心星」步履輕盈，表現乖巧，力度增強，狀態繼續在轉好中。
「澤心星」今季戰績欠理想，11戰不入三甲，但近兩仗都輸得唔遠，尤其上仗同程谷草1200米，10檔麻麻夾硬外疊跟放，形勢惡劣亦好遲先斷力弱，反映狀態已開始到位。最重要是馬兒季內已勁減19分，目前52分低過上次贏馬足足15分。
仲有樣嘢要留意，「澤心星」今場除眼罩上陣，呢個舉動絕對唔尋常，事關佢對上一次贏馬，正係於谷草1200米除眼罩下建功，睇嚟方嘉柏、何澤堯師徒正密謀食大茶飯，大有機會憑呢匹冷馬攜手殺入凱旋門。