政圈同娛樂圈一樣，不嬲都跟紅頂白，基本上係人未走，茶已涼，呢一點現任特首梁振英，或者會有好大感受喎！大家有冇發現，當佢宣佈唔爭取連任後，俾人鬧少咗？可能有權有票嘅人忙於喺新貴林鄭同曾俊華之間團團轉，冇乜閒暇理呢個「過氣」人物。
但梁特似乎唔甘心被冷待，想展示自己仍然存在。佢噚日中午特別喺網誌撰文，強調本屆政府任期餘下4個半月，除咗全體政府同事繼續努力為市民服務，佢更一日連走6場公開活動喎，先喺下午出席婦女事務委員會會議並演講，仲預告傍晚要參加多達5場宴會，包括新界總商會就職禮、勞工界新春酒會等等，強調由婦女、勞工、商界等各界別都包括在內，大讚相關界別對香港都好有貢獻，唔通想藉此強調，仲未被當成透明？