憑炒魷魚炒到上庭而聲名大噪、甚至喺立法會選舉勝出嘅小麗民主教室立法會議員劉小麗，細個原來同𠵱家嘅特首參選人林鄭月娥有共通點，就係經常考第一。40歲嘅小麗話自己叫做有啲讀書天份，讀小學經常考第一、攞100分，只係「偶爾考過第二」。咁有冇好似奶媽咁，考到第四會喊爆然後發憤圖強？小麗話梗係冇啦，因為佢唔太在乎名次，反而人哋嘅期望，就令佢有壓力。
愛闖鬼屋打籃球
小學讀得咁叻，中學梗係派第一志願啦？原來又唔係喎，小麗話當年想跨區讀名校庇理羅士，點知派唔到，派到第二嘅英華女書院（派第二志願都讀到女英華，真係強），但佢一樣讀得好開心。中學成個男仔頭咁，最記得當年同同學去高街鬼屋，仲鍾意長跑、打籃球，到𠵱家自己一唔開心，就會去跑步紓解鬱悶。
小麗讀理科，但選大學時又想住宿舍，想讀吓啲人文學科，所以就決定讀中大社會學，佔中發起人陳健民就係教小麗嘅老師嘞。
自細家貧嘅小麗話，細個冇乜嘢娛樂，注意力放晒喺書，成績叻令佢可以搵外快：「我中三就開始幫人補習，幼稚園、小學生都補過，（收幾錢一個鐘？）80蚊！」嘩，真係書中自有黃金屋。中七時佢走去診所做執藥護士賺錢，睇嚟小麗都好生性幫補家計喎，佢笑笑話，係自己賺錢自己使，冇咩幫補。
小麗話中小學嘅教育影響佢好多，小學老師教佢判斷人係睇佢嘅品德同成就，唔係錢；中學就教佢除咗分數同錢，仲有更多值得欣賞嘅嘢，如友情、理想同知識。
李八方
