藝人興自己搞生意，做老闆。之前王敏德同太太開咗間財經公關公司，第一單就幫新股搞上市儀式，前港姐李嘉慧都唔執輸，噚日以廣告公司Savvy Advertising聯席創辦人兼董事身份，出席貿發局嘅珠寶設計比賽頒獎禮。
早前李嘉慧奶奶做大股東嘅戶外廣告公司奧傳思維（8091）先啱啱掛牌，唔通呢間係旗下子公司？李嘉慧即刻澄清話，Savvy Advertising係佢同老公任偉成一齊創辦，同奶奶嗰間係分開嘅。
佢話𠵱家有3個小朋友，要湊晒佢哋返學之後先可以返工，主要做美術設計，但再問多兩句公司性質同做邊類客戶多，佢就唔肯講太多嘞。