周日英足盃16強比賽，曼聯作客英冠嘅布力般流浪，領隊摩連奴大幅度輪換，將總值1.93億鎊（約18億港元）嘅主力擺喺後備，但難得正選，紅魔鬼二線兵都搞唔掂布力般，要勞煩35歲嘅伊巴謙奠域下半場入替後，先入波奠勝2:1，伊巴心諗：「你班二線兵俾我唞吓得唔得呀。」
雙巴後備出場奠勝局
布力般主場出擊，17分鐘已經令紅魔鬼擁躉驚一驚，丹尼格拉咸禁區內勁射入網先開紀錄，好彩曼聯靠「福仔」拉舒福特單刀建功，半場追成1:1。到62分鐘曼聯都冇乜起色，摩連奴就一口氣換入「雙巴」伊巴同保羅普巴入場，果然75分鐘就由呢對後備兵反勝，普巴後半場長傳，伊巴冷靜地轉身快射入網，以2:1勝出，到89分鐘轉會費3,700萬嘅桑馬達入場，對戰局冇咩影響；不過睇一睇曼聯今場後備席，總身價高過唔少上市公司，單係普巴就以8,900萬鎊由祖雲達斯加盟，3,000萬鎊身價嘅一對後衞艾歷拜利同勞基梳爾更加得個擺字;伊巴就最抵，同青年軍門將甸恩軒達臣一樣免費，不過加加埋埋都總值1.93億鎊。普巴交出助攻心情靚，返屋企仲換上夏登波衫睇NBA明星賽㖭。
八強對車仔先認低威
曼聯晉級八強就對車路士，摩連奴賽前竟然話自己心目中英足盃冠軍已經係車路士喎，唔通寸王肯認低威？而朗尼繼續因傷缺陣對聖伊天嘅歐霸盃32強次回合，對修咸頓嘅英聯盃決賽亦上陣成疑。
