好似好耐冇見過誠哥出來，一出來，果然又叫Mary眼前一亮。
亮在夠霸氣，夠坦白，講到明暗票會投，提名就咪搞。點解？唔係驚阿爺變卦，係因為同個個都熟，費事順得哥情失嫂意箒。嘩，你問我，個位靚到不得了，簡直立於不敗之地，唔似某啲人一早跳晒出來獻媚示忠，Mary心諗，政治一日都嫌長，鬼唔望你班友俾阿爺又玩一鋪。
但係的確唔係個個有誠哥呢啲智慧。有些醒目嘅品牌，會明哲保身，界線清晰，跟足指引，不會隨便被捲入政治風波。但偏偏不少人藝高膽大，唔止唔去避，仲學人玩火。其實積極參與社會討論也並非不可，最緊要這是品牌深思熟慮後的定位，計晒數，得到乜，失去乜，此後打死無怨，只管好consistent咁全方位執行便可。
最討厭是又要學人玩，又要進退失據，一時要威，一時又驚到戴頭盔，家英哥話齋，好難捉摸呀，你叫消費者點睇你先？
上周就有一鬚刨品牌的香港facebook專頁，在七警案審判後懶型咁出post抽水，話有嘢要慶祝，又話耐就係耐咗啲，我哋有請小鳳姐，開頭確係好得某些網民歡心呀，最弊一兩日後即刻跪低，又刪post 、又出道歉聲明，原本like咗的網民立即被辣㷫，係咁留言鬧爆品牌。有人撐admin，認定刪post兼道歉是低B管理層的餿主意；有人取笑品牌玩唔起就不應行這條抽時事水路線，唔係出事先識驚吧！那個道歉聲明，之前看過有1,600個反應，其中1,300個是嬲嬲，仲未計一面倒鬧爆的留言，係唔係攞嚟衰，不難判斷。
彭瑪莉
mailto:[email protected]