原名鄭詩君嘅C君，現年33歲，佢同陸永喺02年以hip-hop組合「農夫」出道，啲歌唔係話唔得，但捱咗5年，到07年同堪輿學家麥玲玲合唱《風山水起》唱到街知巷聞，人氣同曝光率先有改善。
C君唱得作得，又試過出散文集，做主持、司儀瓣瓣掂，個人鬼鬼馬馬咁，佢同陸永喺節目中寸爆鄭裕玲（Do姐）人氣急升，加上近年又開拓埋演戲呢條路，吸埋吸埋唔少fans支持。
不過，C君嘅人生並唔係咁順利，患有地中海貧血症嘅佢，要終生定期到醫院輸血，佢唔單止個身「傷」，心都好傷，於2010年12月，C君宣佈將於2012年7月迎娶拍拖6年嘅圈外女友Gloria，雖然兩人曾多次離合，期間C君亦同林珊珊女兒西瓜拍過拖，但佢話都係覺得Gloria最適合自己。當年只有27歲嘅C君，終決定用10幾萬買咗隻一卡幾鑽戒求婚，仲打算32歲做爸爸，拍檔陸永謂會以一個月人工做人情。
點知到翌年（2011年）有傳Gloria嫌棄C君有地中海貧血症，驚會遺傳畀下一代，突然悔婚出走，同年11月，C君承認同未婚妻分手個幾月，仲話分手初期有喊。
雖然C君緋聞確係少，但唔代表冇女埋身，佢同港台DJ女友黃天頤拍拖已經逾兩年，舊年仲有傳C君有意買貝沙灣海景豪宅做結婚愛巢，仍未達成心願嘅佢，舊年由西貢南圍嘅村屋，搬到去荃灣「壹號九龍山頂」千呎單位，就係為咗畀女友住好啲。