嘉華（173）噚晚舉行周年酒會，主席呂志和趁住商界雲集，趁機「硬銷」佢嘅心血呂志和獎。
佢老人家向來強調社會最緊要和諧，個個安居樂業。噚晚致辭時，佢指社會今時今日好大挑戰，只係追求物質同科技，忽略人嘅內在精神，社會就多紛爭。所以呢，佢設立呂志和獎，希望提倡不同世界或社會議題，今年就着重氣候變化等範疇嘞。
呂志和獎前年9月先至成立，難怪呂志和要落力sell吓。除咗講出口，噚晚明明係嘉華酒會，呂志和亦邀請咗呂志和獎嘅董事會成員，好似港大前校長徐立之、港鐵（066）主席馬時亨、「公職王」鄭慕智等等上台祝酒，可見佢幾咁重視。