台灣男團SpeXial退團成員晨翔，噚日被台灣《蘋果日報》讀者爆料，話佢秘戀賭王千金何超蓮，仲話「媒人」係超蓮前男友吳克群。讀者仲提供咗一段超蓮放喺Instagram嘅短片，片中晨翔喺客廳同小狗玩，其間有疑似超蓮嘅聲音不斷講：「射牠、射牠……」但女子全程冇入鏡，所以無法證實係咪超蓮。
被指是媒人
對於被指係晨翔同超蓮嘅媒人，吳克群經理人回應話：「關於何超蓮小姐的任何新聞，我們不予回應，無中生有的爆料也一切不予回應，謝謝。」吳克群亦話：「別鬧了，有事嗎？」之後還用新歌歌名補充話「實在太幽默」。
據知，晨翔前晚係由香港飛去英國，佢身邊好友話晨翔唔會輕易談戀愛，又話佢同超蓮認識係因為吳克群，因為吳克群當晨翔好似弟弟咁照顧，即使大班朋友聚會，都會叫晨翔一齊去。晨翔朋友仲幫老友澄清，話晨翔同超蓮只係普通朋友，絕對冇可能有感情發展。
本報亦聯絡過超蓮，對於忽然同晨翔傳緋聞，佢透過WhatsApp回覆：「No，只係朋友。」
撰文：馮仁昭
