梁班子最後一份財政預算案周三出爐，民建聯家庭事務委員會噚日發表對預算案期望，話庫房水浸下希望還富於民，特別要向本港家庭派糖，包括減免全年差餉、寬減薪俸稅及個人入息課稅、減公屋租金一個月、額外發放一個月高齡津貼及長生津等。佢哋一共提出兩大版紙，總共9大項27點建議，仲話用咗唔同渠道同政府傳達，例如之前有請願行動等，但民建聯立會議員柯創盛話，新財爺陳茂波至今未有正面回應，有啲嬲嬲豬喎。
柯仔話交稅直接影響家庭和諧，皆因曾經收到求助，有兄弟為分配供養父母免稅額出現拗撬，建議准許兄弟姊妹攤分供養父母、祖父母或外祖父母免稅額。近日學生情緒問題備受關注，佢哋話應該畀多啲錢學校，請多啲駐校社工，以便為學生提供即時危機介入及深入輔導。