感情同人與人之間嘅關係，好可能係世界上最難嘅課題之一，之但係，馬國明、唐詩詠同洪永城嘅「三角關係」，實在有少少亂。
要數呢個關係嘅開端，應該係由馬明同詩詠開始，兩人係同事亦係好友，經常合作，惟女方一直有個崔建邦喺身邊，仲有黃嘉樂同鄭嘉穎等緋聞男友；而馬都唔弱，入行以來，先後同過曾華倩、徐子珊、李詩韻等傳緋聞，多年來公開承認過嘅只有胡定欣嗰兩年情。
被喻為「絕世好女友」嘅詩詠同馬明兩人以契兄妹相稱，每逢女方有事，尤其係感情方面，馬明幾乎都有份回應。喺2011年大台劇《紫禁驚雷》煞科宴上，馬明被打趣叫佢追詩詠，佢爆自己已經等咗對方10年，但女方仍然唔肯「開閘」。
直至前年，洪永城成功追到詩詠，「爭女失敗」嘅契哥馬明唯有告誡契妹「睇定啲」，果然，洪永城緋聞不斷，馬明似乎隨時stand by擔當安慰角色；另一邊廂，馬明同洪永城試過同場現身，但兩人就算有「共同好友」詩詠都好，兩人表現生疏，更有傳喺舊年楊怡同羅仲謙嘅婚宴上，馬明同洪永城差啲鬧事，搞到詩詠非常尷尬。
不過，詩詠試過同契哥馬明及男友洪永城同場，但完全應付自如，被問到怕唔怕3人合照會尷尬時，詩詠仲好有信心話：「唔存在呢個（尷尬）問題。」