今屆立法會開鑼之際，除咗宣誓風波，亦發生一宗唔少人覺得係小學雞、但建制派覺得事關重大嘅事，就係鄭松泰喺議事廳內將建制派放喺座位嘅國旗同區旗倒插，謝偉俊早前就此提出動議譴責，擺明追殺泰博，最終議案交由調查委員會處理，由經民聯梁美芬做主席。佢噚日喺首次會議後透露，盡量爭取喺一年時間內完成調查及撰寫報告。
請鼠王芬食檸檬
據知噚日會議主要通過咗調查方式同程序，而調查嘅範圍就會根據謝偉俊提出嘅動議內容進行。梁美芬話委員會會翻查當日會議嘅閉路電視錄影帶，亦會搜集法律資料進行調查；而除咗動議人謝偉俊、有份聯署嘅議員如蔣麗芸等，委員會同時會邀請鄭松泰提供書面資料作參考。
雖然根據議事規則，會議閉門進行，但梁美芬話會去信泰博了解佢嘅意向，若泰博要求公開亦會考慮。但泰博請委員會食檸檬，表明唔會出席會議，話忙於服務市民，唔想嘥時間喺政治批鬥。