經歷上周中歐聯大敗畀巴黎聖日耳門嘅巴塞隆拿，周日返到主場出戰西甲，始終未見霸氣，面對升班馬雷加利斯，「MSN」組合悉數正選，前鋒美斯四分鐘已經開紀錄，不過球迷預期嘅大屠殺不單止冇出現，反而雷軍越踢越順，不乏埋門機會，71分鐘巴塞後衞沙治羅拔圖後半場扭失波，客軍由烏尼盧比斯一度追成1:1；巴塞呢場拎三分都真係好彩，90分鐘由尼馬博到12碼，美斯射入，個人梅開二度，先以2:1險勝。呢場波巴塞[-2]，僅勝一球又爆出3.65倍「客勝」。
尼馬賽後被指插水
雷軍賽後就批評尼馬插水，被罰12碼嘅後衞馬田文度雲尼就話，當時自己已經收晒腳，只不過尼馬撞埋嚟，仲好有演技咁樣插水，呃個12碼番嚟。巴塞三分已袋，教練安歷基就啋你都儍，仲話球隊已經有好開始；巴塞仍然以一分落後皇馬排第二，不過皇馬就少踢兩場。