曾俊華參選特首後，網上攻勢超晒班，噚日再有星級人士助陣拉票，就係做過《壹號皇庭》、《妙手仁心》同《衝上雲霄》嘅藝人陳慧珊（Flora）。
70年代相識於波士頓
薯片叔喺facebook貼咗Flora撐佢嘅短片，自爆薯片叔「由細睇到我大」，當佢係「大哥哥」，原來兩人70年代喺波士頓相識，竟然因為跳舞結緣，皆因佢哋有同一位舞蹈導師兼創作人，就係Flora嘅爸爸嘞。Flora大讚薯片叔學習能力高，睇幾次示範已經識得跳，無論跳弓舞、蒙古騎馬舞等剛硬舞蹈，以及溫柔舞如絲帶舞等，都難唔到薯片叔，反映對方剛柔並重、做事唔只企硬，亦有創意同識變通。
Flora話讀教育系博士前徵詢過薯片叔意見並獲支持，相信對方好欣賞「教育是向前邁進的道路」理念。至於點解撐薯片叔參選？Flora讚大哥哥對唔同突發事件都好快做到決定，亦好有幽默感兼令大家團結，指薯片叔同佢一樣在美受教育，但個心好「中國人」，希望下次見到薯片叔可以稱呼佢做「行政長官」。