教育局局長吳克儉又飛咗嘞……好出奇咩？不嬲吳得掂嘅「外訪」足迹遍佈世界各地㗎啦，駐守香港反而會令人意外㖭。原來近日佢離港到咗泰國，仲要係有成果㗎喎！
話多元化吸人才
吳得掂噚日同泰國教育部部長Teerakiat Jareonsettasin喺曼谷開會，仲達成協議，決定喺2017至18學年推出「一帶一路獎學金─泰國」計劃，吸引泰國傑出學生來港讀學士學位課程。吳得掂話計劃有助推動香港高等教育界進一步國際化及多元化，培養具備環球視野同國際網絡嘅優秀人才。
計劃為期3年，香港每年向泰國學生頒授最多10個獎學金，畀佢哋在港就讀公帑資助院校嘅學士學位課程，學費資助額可達12萬元，款項由香港中國商會主席陳經緯同香港經緯集團有限公司捐助。有需要嘅學生每年仲可獲5萬蚊額外定額助學金㖭。