泥地賽非本港賽馬主流，每年馬季所編排的場數有限，競爭相對激烈。徐雨石埋頭苦練，當正泥地係主場，今午（19日）沙田日賽又見呢位練馬師在泥地贏馬，佢於第五場四班泥地1200米以「閃耀駿駒」食糊，此駒在羅理雅胯下首戰泥地即贏馬開齋，單Win及組合獨贏A2分別派75.5及27元。
今次其實唔止一不離二而係二不離三，事關連同頭場霍利時馬房「快趣的」及第四場呂健威之「公証揚鳴」，全日僅有的三場泥地賽，都由初跑泥地的在港未勝馬開齋。
第四場派彩作實後，第五場之「閃耀駿駒」一度有巨額過關得3倍左右，後來才回飛到7.5倍，此駒去年底12月2日以四班馬身份，由何澤堯贏泥地1200米試閘，造出時間比當日贏其餘三組同程試閘的三匹高班馬都要快，場地實力可見一斑。
最終五歲馬「閃耀駿駒」以行動證明自己擅戰泥地，今場藉一檔在羅理雅胯下早段已透出，直路早着先鞭，力壓直路一度困守內欄冇位出的潘頓座騎「金多多」及田泰安新勝馬「情意相投」建功，亦助徐雨石延續季內泥地賽上名次數最多練馬師的威名。「金多多」、「情意相投」分別跑第二及第三，第四名由「歐洲巨星」拎到，四重彩派四萬五千幾。
徐雨石說：「『閃耀駿駒』上場形勢非常不好，被頂出外疊稍後的位置，輸在形勢，牠今場上陣，轉彎時我都驚一驚，擔心轉彎飛咗出去，好彩羅理雅駕馭得宜。」
順帶一提，羅理雅剛周三（15日）晚在谷草尾場不小心策騎，被判停賽三個賽馬日及罰款十萬元，呢次「閃耀駿駒」贏馬正好幫佢補數。