外號猛人輝的巴西籍英國前冠軍騎師蘇兆輝，今季在港客串做馬會騎師（俗稱公司騎師），受多次被罰停賽影響，戰績冇上季咁堅，不過都有唔少代表作留低俾馬迷回味。
今午（19日）佢於季內告別戰第九場二班田草1400米，勝出何良馬房「赤兔寶駒」正係其中之一，此駒爆14倍冷Win開齋，組合獨贏A3派20元正。
「赤兔寶駒」乃英國1600米大不列顛錦標冠軍，屬貴價愛爾蘭自購馬，已報名下月19日2000米香港打吡。今仗14檔起步，之後蘇兆輝慢慢將座騎移入內欄包尾位置，慳位跑一步不蝕，處理上落足心機，最後直路人馬無遮無掩沿欄直上，輕輕鬆鬆衝過晒所有對手，以兩個馬位之先勝出，在港第二次出賽縮程至1400米即勝。
馬主蔡華波首度以個人名義在港養馬有好開始，今次贏馬另獲75萬元優異成績計劃特別獎金（因「赤兔寶駒」首勝二班賽），可謂雙喜臨門。賽後同場落第馬「龍船」馬主劉皇發之子劉業強亦有陪蔡華波拉頭馬，場面熱鬧。
講番蘇兆輝早前獲續牌一個月，原本跑埋今個月至走，惟剛周三（15日）晚不小心策騎「喜得福」被判本月最後兩個賽日停賽及罰款7.5萬元，變成跑埋今日就鬆人。結果佢於呢次提前告別香江之戰，以頭馬留下美好回憶。
今場同時見證何良馬房雞年首度建功，以及季內初次見到何良同蘇兆輝合作勝出沙田賽事，至於已報名打吡的「赤兔寶駒」賽後將突破90分，好有機會成為繼今日第七場「喜旺寶」後，另一匹贏普通賽事成功爭分出線的打吡報名馬。
第九場二至四名順序為「勝利導航」、「歌神」及後備補出馬「小龍兒」，四重彩派近22萬元。