「薯片叔叔」曾俊華前日雖然去完觀塘出席公屋聯會交流會，仲要去旺角同社福界選委會面，但完全無阻佢嘅美食之旅，趁會同會之間有一小時空檔，就去咗九龍灣「零碳天地」小休，飲咗杯茶同食件多士，順便曬吓太陽，吸收一吓維他命D，仲同路過嘅輪椅人士交談。其實薯片叔呢次唔只為咗食嘢，噚日佢喺fb貼文時，就介紹零碳天地係香港第一座零碳排放建築，佢喺2012年以財政司身份喺度主禮開幕，話減少能源消耗，先可以創造優質生活環境。佢又話政府除咗會以身作則，帶頭推動綠色建築外，仲會以立法促進業界採取綠色措施，提供誘因鼓勵業界喺建築期間引入低碳元素，希望實現可持續發展嘅理念喎。