中環人食晏，想搵個食得好又傾到偈嘅地方，來來去去都係幾個地方，皇九係其中之一，皇九樓上之前有間「港島廳」，舊年12月老闆將佢變為「潮廳」，由粵菜變為潮州菜，內部裝修冇乜點執，廚房埋班就掂。
潮州菜有好多選擇，呢度糖醋麵至為精彩，外面潮州菜館嘅糖醋麵，咬落的確脆卜卜，但咀嚼下去總是令牙齒受罪，呢度嘅糖醋麵卻真正做到外脆內軟。
聽講，潮廳行政總廚張林波（波哥）有獨特方法做糖醋麵，佢先將全蛋麵用油炸，再放於大鑊內，加高湯煨至入味，之後慢火收湯，慢慢將麵嘅兩邊烘至金黃色。據講，外面好多潮菜館最尾改用平底鑊煎脆麵嘅兩邊，出來嘅效果變成硬脆，做唔到外脆內軟。
說到底，所有菜色都係講功夫與心機。