一向斯文打扮嘅「奶媽」林鄭月娥，噚日晨早9點到訪「大師」林大輝間中學。唔知係咪一早獲大師指點，知道要入運動場參觀佢對手「薯片叔叔」至耍家嘅劍擊比賽，所以奶媽罕有着咗件螢光黃色、寫住「香港郊野全接觸」字眼嘅風褸，再加條夠晒愛國嘅「李寧牌」黑色運動褲同白色波鞋現身，唔使好似其他着皮鞋嘅女士咁，要搵膠袋包住對腳先入得運動場。
家長叫合照 有求必應
一臉輕鬆嘅林鄭，一落車即不停嘴郁郁𡁻嘢，似乎一早就食定香口膠，提防咁早起身有口氣。
林鄭進入運動場期間，唔少家長都叫準備劍擊比賽嘅小學生同林鄭合照，林鄭亦有求必應，其間仲攞起學生仔把劍研究。林鄭競選辦副主任、體育界選委陳念慈，就好似做咗現時特首辦「白宮發言人」馮煒光個位，不時充當攝影師，舉機幫林鄭影相留念。
林鄭噚日發言就好畀面咁用「大輝兄」尊稱大師，話一直有留意大師喺立會表現，話大師一講到教育問題「就青筋都現晒」，仲讚大師對教育的熱誠令佢感到敬佩喎。