長和系主席李嘉誠（超人）噚日出席旗下基金會贊助嘅汕頭大學海洋划艇活動，除咗難得企定定、對特首選舉幾乎有問必答之外，趕住去同孫仔食晏嘅超人，臨走前仲特登提一眾記者攞紀念品，乜嘢紀念品令超人咁上心呢？
最初大家以為超人會送同划艇相關嘅模型之類，公關竟然拎出一袋袋嘅《心經》……金頁！裝住金頁嘅信封面上寫住「內藏《心經》金頁 祈願心無罣礙」，而篇《心經》就刻係一張重量約1克嘅足金金頁上面，據講金價值幾百蚊。
超人紅顏知己周凱旋就話，由於喺薄薄嘅純金頁上刻字有一定困難，所以今次係專誠搵人去日本訂做嘅。唔知超人送《心經》，係咪覺得近年香港戾氣太多，想大家讀《心經》淨化下？
11歲逃避日軍
講番今次李嘉誠基金會贊助嘅汕頭大學海洋划艇活動，係為保育海龜同紅樹林籌款，10男10女共20名大學生，分兩隻艇用咗8日時間由汕頭划艇嚟香港，一共划咗640公里。超人上台致辭時，就回憶自己11歲由潮汕走難到香港，話當年為咗避日軍，要先北上再南下，又指自己當時未見過大海、未見過汪洋，最終經歷1,000公里路程先到香港。佢話，自己呢8日嚟每日都用衞星留意住同學嘅行蹤，睇到佢哋手機分享嘅故事覺得好感動。李嘉誠會每隊捐出10萬元，以支持佢哋嘅海上保育工作。
雖然超人話怕得罪人而唔提名，但如果有普選，佢就未必走得甩喇。皆因周凱旋噚日被問到會唔會選特首，就話佢都想，仲話佢講過有普選嘅時候就選！
李八方
