國際田聯世界室內巡迴賽最後一站比賽喺上周六於英國伯明翰完滿結束，而英國中長跑好手法拉嘅室內賽生涯亦有一個完美句號，因為佢喺男子5,000米以13分09秒16獲得冠軍，將自己所保持嘅室內歐洲紀錄提高咗一秒多，而33歲嘅法拉賽後話：「好難相信呢場係我最後一場室內賽，不過可以打破紀錄就更加意義重大！」佢仲話喺八月嘅世錦賽之後，就會轉戰公路賽。