現年50歲嘅粵劇名伶蓋鳴暉，畢業於香港八和粵劇學院，80年代開始學戲，學成後於89年出道，並喺90年組成鳴芝聲劇團，至今班底增至80多人。
受粵劇音樂家朱慶祥先生啟蒙的蓋鳴暉，獲已故粵劇名伶林家聲賞識，收為徒弟同契女；同時，蓋鳴暉亦感激伯樂－－於11年離世嘅鳴芝聲劇團班主劉金燿，現時班主一職由其長女劉幗瑛接任，劉太更視蓋鳴暉如親生女。
正所謂「台上一分鐘，台下十年功」，至今加入梨園27年，蓋鳴暉認同除了努力，天時地利人和都很重要。她說：「當年我係黃毛丫頭，有人介紹我認識劉生，幸運喺嗰剎那出現，我把握住。幸運同機會兩位仁兄好巿儈，幸運唔係必然、唔係奉旨，機會成日行嚟行去，好似捉精靈咁，周街都係。」機會總留俾有準備嘅人，蓋鳴暉話：「天無絕人之路，冇免費午餐，努力過就會有成果，完全唔努力就一敗塗地。」
蓋鳴暉視演戲做終生職業：「真係人生有幾多個20年，我係經過順境逆境，開心多過唔開心。」
入行逾20年，蓋鳴暉坦言永不言休，近年更開始物色接班人，希望將粵劇發揚光大：「呢啲帶唔走，我想將粵劇薪火相傳，搵緊合適人選，收徒要睇佢質地。」
採訪：比華利