喺一個氣溫跌到11度嘅晚上，最好當然係高床軟枕，匿喺被窩暖笠笠，但粵劇名伶蓋鳴暉嘅戲迷，喺北角新光睇完戲都未捨得返屋企，反而喺散場走去後門等偶像，戲迷見佢即上前簇擁、鼓掌歡迎。雖然班戲迷只係近距離接觸到蓋鳴暉幾分鐘，但每個人臉上都流露住滿足笑容，呢個畫面好窩心，完全驅走寒意。
近20位、加埋近千歲忠心戲迷咁願做「實Q」，護送蓋鳴暉上保母車，目送偶像坐駕開走後，又一窩蜂轉身跑出英皇道嘅電車站，走去十字路口兜截蓋鳴暉保母車，再同偶像揮手say goodbye。見戲迷一番苦心，坐在司機位旁的蓋鳴暉也把握機會，與之揮手說晚安。途人見到這班「千歲戲迷」的熱情無不嘆服，其追星魄力與瘋狂程度不遜於後生女追韓星。
蓋鳴暉嘅戲迷以女性居多，唔係太太就係婆婆，近年多咗一班後生女，當中很多都是闊太。追星中嘅貴氣阮太話：「我追隨咗佢20年，佢做幾多場，我睇足咁多場，佢帶歡樂畀我哋，睇得好開心。」中女Daisy都係睇足咁多場，其實消費唔平，佢話：「值得嘅，因為佢我先睇粵劇，我淨係睇佢。」企外圍較年輕嘅劉小姐就話：「我都睇咗10年，欣賞佢好勤力。」
蓋鳴暉係戲迷嘅偶像，咁佢嘅偶像就係萬人迷劉德華：「好欣賞佢，乜都好努力，我哋曾經喺慈善表演合作，佢鼓勵過我。華仔同我分享臨帖，可以令心境寧靜，所以有時我會喺屋企抄寫戲曲，成個過程好似影印機，加深印象。」