【《蘋果》專訪】粵劇名伶蓋鳴暉視演戲做終身職業,近年開始物色接班人,希望將粵劇發揚光大。50歲文武生的她台上跟花旦談情說愛,台下卻絕緣,有事業缺愛情,她日前在北角接受本報專訪時說:「人生永遠冇完美,就當缺憾美,我dry得好緊要。」滋潤蓋鳴暉卻是家中兩隻愛犬,訪問當日她兩犬也相陪。
下世都做女仔
蓋鳴暉不覺為事業錯過真愛,她說:「冇人提我佢係咪追我,𠵱家有家人同粉絲愛護,冇乜期望。我做文武生,接觸我嘅全部都係女性,喺我嘅戲班又全部都係長輩,好難搵到一個情投意合、志趣相投嘅異性,就算有,都係當我兄弟。好得意,好多男性朋友,都真係當我係𡃁仔。我𠵱家擇偶要更加小心,因為唔係十幾歲年輕人,一切隨緣。」
一出虎度門,蓋鳴暉帥氣,每次完騷,總有至少二十名上年紀忠粉守候戲院外,這班加埋近千歲戲迷不但做「實Q」護駕上車,當車開走,戲迷又一窩蜂跑出英皇道的電車站,站立十字路口兜截蓋鳴暉保母車揮手,闊太戲迷瘋狂追星,程度不遜後生女。問到蓋鳴暉下世投胎,做男還是做女?她說:「做番女仔,因為我鍾意靚。唔恨做男仔,以中國人嚟講,男仔要照顧人,懶man咁,死撐啦,我唔想做死撐嗰個,同埋唔想做家庭支柱。搵錢好辛苦,使錢就好開心,好似我阿媽咁,使得好開心。」
蓋鳴暉是戲迷心中偶像,但她卻鍾情萬人迷劉德華:「佢乜都好努力,曾經喺慈善表演合作,佢同我分享臨帖令心境寧靜,我會喺屋企抄寫戲曲,成個過程好似影印機,加深印象。」
採訪:陳杰
攝影:沈健程、陳俊強
化妝:Chris Lam
髮型:Yman Chow
場地提供:新光戲院