由陳小春飾演韋小寶嘅無綫劇《鹿鼎記》，雖然係十九年前嘅事，但一班小寶老婆感情相當好。前日梁小冰、陳少霞、劉玉翠、馮曉文同陳安琪又約埋去尖沙嘴食飯，之後再去教堂影相，見佢哋又瞓晒地又跳起影相，相當開心。原來陳少霞老公李文輝都有去食飯，之後仲變身韋小寶同五個老婆仔合照。
小冰讚李生
小冰噚日話成班人本來帶埋老公同仔女，坐陳少霞老公隻遊艇出海，老婆着泳衣曬太陽，老公唱卡拉OK飲香檳，之後再去南丫島食海鮮，但結果因為鄺文珣病咗而令計劃有變。小冰話：「臨出發前一日，小郡主鄺文珣本來一家四口同我哋玩，但佢病咗，我哋又好想等埋佢先，所以下次先至出海啦！」
改去尖沙嘴食日本菜後，陳少霞就建議去隔籬聖安德烈堂影相，小冰話當年同陳嘉輝結婚都喺呢間教堂：「結咗婚十七年都未去過，老公要拍劇嚟唔到，我帶咗囝囝嚟，少霞老公李生都有嚟，我哋又plan去旅行，人生去到呢步，目標都係吃喝玩樂，享受人生。李生好好，見我哋影到興高采烈，佢靜雞雞買雞蛋仔畀我哋食。」
撰文：馮仁昭