李嘉誠越老越精靈，周日佢表態，表示唔會提名任何人，而選舉日就一定會投票，因為係投暗票。呢番說話係對挺林鄭陣營鋪天蓋地「欽點」宣傳、誓取700提名票的當頭棒喝。李嘉誠唔提名林鄭，其實即係表明態度，但為免俾人打小報告，所以其他三人亦唔提名。西環盡取提名票送畀奶媽，正正係要將本來投暗票嘅制度扭曲成為投明票。因為西環本身有一份自己人鐵票名單，只要將公開提名名單及最後得票一對，就知道邊個走票冇投林鄭。假如700人提名林鄭，佢最後得票是678，中間有22票走咗，要找出這22人並不難，只要將提名名單減去自己人鐵票名單，就可以將範圍收窄。如果選委因各種利益問題怕公開得罪西環、張德江，又唔情願在受壓下支持林鄭，唯一方法就是學李嘉誠，個個都唔提名。超人慌死大家唔知，仲特別強調最後投暗票，冇人知。大家仲唔醒！
今次特首選舉是一場博弈，舊利益集團意圖延續689管治，梁是被習大大DQ的，最近傳媒透露梁收到習回覆才正式死心，但這幫人迅速集結在林鄭背後，短時間內製造群眾擁戴局面，最後靜候習近平一人點頭作實。問題係過去幾年梁振英鬥爭為綱路線撕裂香港，即使建制及工商界內不滿者比比皆是，起初共產黨官僚判斷這是唐梁之爭產生ABC的後遺症，若果換了台前keeper，搵個樣好少少嘅林鄭，唐營歸隊，三高當選自然天下太平。但有一點好多人估錯，建制內唔係只有利益掛帥，奉行nothing talk, money talk原則。建制內仍然有人係想維護香港核心價值，對梁五年來倒行逆施心痛惡絕，我相信李嘉誠就是這類人。
林鄭欠缺心維護核心價值
表面睇林鄭似乎正常過689，亦冇乜政治污點，甚至政治面貌相當模糊，可以討好各方。林鄭今天失去本地中產民眾信任，是源於她欠缺維護香港核心價值的決心，當中有個人選舉工程失誤因素，但更大原因是背後造王集團作為，引起市民憤怒。
整個共黨官僚系統押注林鄭後，視薯片為泛民追打，現任特首、官員不顧形象及程序公正，群毆薯片，呢班人在市民眼中猶如過街老鼠，每次出招攻擊薯片，市民對林鄭的憎恨就上升一分，再加上低水平的左報宣傳機器抹黑攻擊，薯片就算瞓喺度民望都會持續上升。林鄭無法擺脫689這件政治負資產，也不敢同689管治路線作清晰切割，她如此取態，那批並非為利益而真心反梁者，自然唔肯上船。香港問題歸根究柢在於一個「左」字，如果北京唔好好處理硂反省「梁振英路線」，清除治港極左勢力，即使成功扶植林鄭上台，也無法產生足夠政治能量，推動施政、政通人和。
農曆年間李嘉誠到中聯辦拜訪張曉明「中伏」被擺上枱，照片在網媒曝光，用到咁低招數對付李嘉誠，意圖製造李嘉誠歸隊挺林鄭印象，當時我已預見李不會就範，共黨官僚機關算盡太聰明，就是算不到李嘉誠對香港的感情！
添馬男