兩位司長競選特首，在提名票方面，林鄭月娥大勝，建制派受張德江指示，群起擁抱林鄭，視莊曾如無物，會隨時出現一個可能性，就係林鄭盡攬建制選委票，令到泛民主派嘅三百二十零票成為廢物，林鄭以869票，不是689票「當選」嘅話，就真係食咗三聚氰胺奶粉弄至頭大了，更加目無餘子。
目前講票數林鄭贏晒，公關民望就莊曾遙遙領先，但民望不會造成選委票，徒增惆悵。惆悵者不止選舉輸家莊曾，贏家林鄭及幕後北京操盤手，亦感惆悵，以後五年一個民望偏低嘅特首點樣擺平香港撕裂局面？
為咗競選公關，林鄭競選辦在二月十四日發佈丈夫給太太的情信，長久低調不見人的林先生──林兆波教授給鄭月娥的情信曝光，附送一幀兩人在芬蘭旅行嘅合照。林教授係數學家，大概不擅以中文表達感情，左丁山年輕朋友從fb下載轉來俾左丁山睇睇，只覺得十分生硬，情書缺乏的就是一份情，不過老夫老妻有乜好寫，不足為奇，但在所謂情書內講到：「期望你能成功當選並在新崗位上為香港市民努力工作，為落實一國兩制作出貢獻。」就真係講黨性多過講人性，在2月14日同老婆講呢啲，大煞風景。
以此問幾位女性朋友，個個唔like，話明如果自己老公在情人節寫情信希望「自己在公司升上CEO職位，為公司作出更大貢獻」，就會擰轉面喊咁話。問吓幾位男性朋友，佢地就講：「想點呀，教數學係直啲嘅啦，老婆威成咁，唔講呢啲講乜嘢？」星島日報話曾俊華趁機抽水，暗嘲林教授講一國兩制，寫上「今天我們不談一國兩制，只談一生一世。」如果係抽水嘅話，就真係一抽中的，夠晒攞命！問小G網上有何反應，小G話：「所有女士都冧晒呀，不談一國兩制，只談一生一世，直情係情人節金句，神句，個個引用！」
聽講林教授依家在北京教書，與強人妻子聚少離多，講起嚟，可能係拜李國章所賜。一位中大老鬼（理學院中人）告知，李國章當年做中大校長之後，厲精圖治，要追過香港大學，方肯罷休，於是不顧中大傳統溫情主義，大舉換血，令到不少老師離休，以致得到King Arthur嘅外號，林教授就在嗰陣離開中大遠赴英國，林鄭最初自願降職相隨，往倫敦做特區政府駐英代表，之後俾曾蔭權提拔，擢升回港，令佢仕途上從此大躍進。幾個月後，林鄭絕對有可能成為香港大學校監，對住港大校委會主席李國章，唔知會唔會談起老公舊事，一笑置之呢！