加拿大靚女網球手寶查喺社交網站派糧就派得多，今年直情上埋美國《體育畫報》（Sports Illustrated）年度泳裝特集大擺誘人甫士，但娘娘「收兵」得嚟都好有口齒，早前就講明會履行超級碗輸賭，承諾同一位力撐新英倫愛國者反勝亞特蘭大獵鷹嘅fans約會，佢早日喺twitter留言話：「同《體育畫報》泳裝特刊過咗忙碌嘅一日，然後今晚……我就去約會啦！」結果娘娘真係做找數真漢子，上周約咗呢位叫阿John嘅fans約會啦，節目之一就係去睇NBA網隊對公鹿嘅常規賽！