上周六英足盃16強都幾有冷味，李斯特城、曼城同般尼呢三支英超球隊都中伏，其中「狐狸」李城下半場踢多米禾爾一個，竟然俾對手完場前絕殺，以0:1出局。以李城咁嘅勢，嚟緊歐聯作客西維爾睇怕凍過水。
換10個正選留力歐聯
李城喺星期三將會出戰歐聯16強首回合作客西維爾，所以喺呢場作客英甲米禾爾嘅英足盃16強，領隊雲尼亞里大輪換，足足換咗10個正選。李城上半場踢得幾好，但入唔到波，到52分鐘，米禾爾更加有中堅積基谷巴拎第二面黃牌被逐。李城換埋占美華迪出嚟，諗住谷一谷，點知喺完場前，米禾爾靠右閘沙恩甘明斯攻入全場唯一入球，以1:0絕殺李城。
雲尼亞里話紅牌係轉捩點，「我哋下半場已經跌watt，當去到11打10嗰陣，米禾爾就踢得好過我哋。佢哋更有決心，求勝欲更強，值得贏波晉級。」雖然牌面上係爆冷，但李城出局唔令人意外，因為雲尼亞里暗示過好多次，護級大過天，英足盃可以犧牲。
高帥舊屬逼曼城重賽
講到意外，真係要講吓曼城，出咗阿古路、費蘭甸奴等主力，作客英冠嘅哈特斯菲爾德只踢成0:0，嚟緊要重賽。哈特斯菲爾德領隊華格拿都大有來頭，係利物浦領隊高路普以前教多蒙特嘅馬仔，一度傳過去紅軍幫高路普手，但最後去咗哈軍。利物浦喺聯賽同曼城爭緊前四名；家陣哈軍逼到曼城要重賽，相信高路普會多謝華格拿。
上周六早場，林肯城作客1:0贏般尼，成為自1914年嚟首支入八強嘅非聯賽球隊。般尼呢場輸波輸品，中場祖爾巴頓被影到特登踩對手，之後仲要插水，賽後被狂插。巴頓賽後解釋，話自己只係干擾對手喎。至於車路士繼續穩定發揮，靠柏度洛迪古斯同迪亞高哥斯達各入一球，作客2:0搞掂狼隊晉級。
