養傷三個月後，加里夫巴利上周六復出，仲即刻有波入。呢場皇家馬德里主場對愛斯賓奴，艾華路莫拉達先喺33分鐘頭槌開紀錄，但之後拉開唔到比數。71分鐘，巴利後備入替，喺83分鐘就即刻展示佢最耍家嘅高速推進，殺入禁區入波，幫皇馬鎖定贏2:0，繼續排榜首。教練施丹賽後大讚巴利，話完全唔覺呢位球星唞咗三個月。巴利嚟緊夏天就會同未婚妻艾瑪拉埋天窗，但有留意新聞都知，艾瑪有班麻煩親戚，其中佢表姐仲同毒販有瓜葛。巴利同艾瑪都擔心呢啲麻煩親戚喺佢哋大好日子搞事，所以唔請佢哋嚟飲。
除咗巴利，基斯坦奴朗拿度（C朗）都係呢場波嘅焦點。有啲球迷成日話C朗老，唔識突破，但佢今場表演咗球好有細哨影子嘅通坑渠過人，驚技四座，段片賽後喺網上流傳。