今時今日，銀髮族真係唔可以睇小，好似剛申請上市嘅玩具廠「童園國際」，大股東之一嘅媽媽梁小蓮，71歲仍然落手落腳睇實生產基地嘅存貨、財務同船運，絕對唔係掛名嘅虛銜，而所有執董都由佢一家人擔任，除咗主席爸爸盧鴻（73歲），三兄妹分別睇實成本、產品設計、客戶關係。
童園國際來頭都唔細，簽咗唔少大客嘅特許權，包括迪士尼、VIMN（愛探險的朵拉）、Dreamworks（功夫熊貓）、Marvel Characters B.V.等等，幾乎小朋友鍾意嘅卡通角色都包辦。
除咗代工，童園都有自家品牌Kiddieland，最耍家就係生產學行車之類嘅戶外運動玩具，去年佔收益78%，其餘收益來自嬰幼兒玩具及學前玩具，一年收入有4.5億元。弊在最近三年收益一直跌，唔知內地開放咗二孩之後，會唔會幫到手呢？