外號「體操精靈」嘅孫延在喺上周六宣佈唔會再參加比賽。呢幾年佢一直係南韓體壇嘅Icon之一，家陣決定退役，佢嘅粉絲梗係傷心啦。
自從有「冰上女王」之稱嘅南韓花樣滑冰選手金妍兒喺三年前退役之後，孫延在呢位韻律操選手就成為咗南韓體壇嘅頭號靚女運動員。現年22歲嘅孫延在呢幾年喺亞洲玩晒，可惜唔可以好似前輩金妍兒咁喺奧運同埋世錦賽稱霸，成績最好嗰次亦只係喺2014年世錦賽攞到圈操銅牌，至於喺2012年同2016年奧運就喺個人全能得第五名同梗頸四。六歲就開始玩韻律操嘅孫延在上周六咁話：「我好開心自己做到一個韻律操運動員。我玩韻律操玩咗17年，而喺呢17年，每一日都過得好有意義。韻律操雖然係一種好柔嘅運動，但係卻令我變得堅強同好硬淨。感謝大家一直對我嘅支持同埋鼓勵。」