【本報訊】康文署剛展開為期3月的非物質文化遺產公眾諮詢，幾近失傳的鳥籠製作手藝早列清單，惜難逃後繼無人命運。75歲的陳樂財，是香港碩果僅存鳥籠工匠，師承已故大師卓康，「卓籠」曾以天價50萬成交。身為入門弟子，財叔由做籠到修籠無一不精。「啲人話我叻，但比起我師傅，差好遠。」尊師重道，這份堅持同樣幾近失傳！
記者：呂麗嬋
情人節花墟人頭湧湧，一街之隔的「雀仔街」卻是另一個江湖。到處都是籠中鳥，清一色麻甩佬，「小姐你搵啱人，財叔係香港第一，喺呢度冇人唔識，旅發局遲啲叫佢出嚟推廣，唔得閒理你㗎喇」。閒着打躉高談闊論的雀友甲乙丙，人人七嘴八舌。
名籠有價 每款只做一雙
「𠵱家啲籠個個一樣，大陸進口大批咁做，以前好多都係本地師傅手作，每個師傅嘅手勢都唔同，我哋內行人一睇就知，有牛籠、又有楊籠。我師傅卓康做嘅，就係卓籠，佢最出名係做籠腳，啲籠好多只做一對，極少重複」。財叔口在說，但雙手沒閒着。鳥籠是傳統手藝，是竹器和木材的結合，講求均勻，籠圈要夠圓，就如行雲流水，多一分少一寸都不完美。「做個籠要幾個月，以前學師，由開竹學起，火燒完熱水烚，好多工夫」。
火水燈上一點紅，竹籤遇熱，在火光下慢慢收縮變彎，力度過猛會斷，過輕紋風不動，統統都是經驗。現代人追求自由，米埔觀鳥既環保又時尚，但在上世紀「籠中鳥」卻盛極一時。50年代，貴公子一手托鳥籠一手搖摺扇；70、80年代，貴族玩意下凡，品茗賞雀，漸趨普及。財叔謂，養雀人對鳥籠都十分講究，手工精緻的名籠有價有市，造就不同門派，各有山頭。
退休前當差、不時來雀仔街打躉的球哥，與財叔相識40年，笑言未成雀友前，曾遇市民報失鳥籠。「最記得個男人氣沖沖咁嚟報案，話個籠值十幾萬，以前唔識，我仲話你講到咁大冇用，我哋唔會賠番錢畀你㗎喎」。內斂的財叔在旁亦不禁偷笑。
座落園圃街的雀鳥公園，搬遷前在旺角康樂街，即朗豪坊現址。「細個同舅父住，佢係我第一個師傅，嗰時卓康師傅住喺樓上，成日嚟舖頭傾偈」。財叔自言一埋位做籠就粒聲唔出。「嗰時（卓康）師傅已經好有名氣，見到我做籠都會指點一兩句」。在人浮於事的年代，哪想到一代宗師竟留意這個13、14歲黃毛小子。
百呎小舖 籠中老人飛不走
「原來佢同舅父講，話想我過去幫佢手」。名師挖角，受寵若驚，二話不說答應。上一代人怕教識徒弟無師傅，這個亦師亦友亦老竇的師傅，卻傾囊相授。「以前冇名氣，有個客人竟指明要我做籠，我話驚做唔掂，佢望吓師傅打眼色，意思係唔識就搵佢教，無非係鼓勵我畀心機學嘢」。小小恩情，記了半世紀。
「喺鳥圈冇咩身份、貧富之分，手藝好、最識觀鳥嘅，就係前輩」。1972年已可獨當一面的財叔，在師傅鼓勵下自立門戶，這個冷門行業，一做便62年。「𠵱家已少做籠，主要幫啲客修補舊籠，不過已冇晒時間」。百呎小舖天花掛滿斷竹枝待修的鳥籠。「𠵱家全港得佢一個做，冇人敢催佢」。坐在一旁的球哥搭訕。「個個叫我唔好退休，話怕啲鳥籠爛咗冇人修理，我話做到點解要退？」財叔笑着說。