D1學界周三就揭開戰幔啦，其中一個要留意嘅項目，係田項嘅跳高。
喇沙書院嘅林衍澤係其中一個熱門，因為上年佢以1米96嘅成績破咗B-Grade學界紀錄，攞到冠軍。不過今年升上A-Grade，就未必咁易啦。因為佢最大嘅對手係九龍華仁的上年破A-Grade紀錄嘅楊啟宇。
其實佢地兩個喺上年11月尾，南華會嘅全港學界已經碰過頭，當時大家都造出1米96嘅成績，林衍澤以少啲試跳取勝。不過，去到真正嘅D1學界，衍澤目標就係跳得高過米高佐敦。欸，其實都係打個比喻，等你地易明啲啫。MJ身高1米98，高過佢咪即係高過1米98囉。「贏冠軍就一定要有2字頭，要攞最好的成績，跳過2米，先能為學校取得最好的分數。」
初初因為學校唔夠人，先由跨欄轉戰跳高嘅衍澤，當初都無諗過自己有今日嘅成績。雖然上個月參加省港澳田徑賽時，受咗輕傷，但係都無阻佢為學校喺學界爭取獎牌嘅決心。
今年學界繼續喺灣仔運動場舉行，之不過上個月CY喺施政報告就話，會將運動場拆卸改建。即使只係比賽左幾年嘅衍澤，都出聲話唔想呀。
點都好，衍澤要喺學界加油啊。
記者：禤家民、洪坤奇
攝影：余峯文、張宗光
剪接：林家鴻