車路士守將大衛雷斯向來係球隊裏面嘅開心果，一個唔覺意就會成為佢嘅整蠱對象，今次就輪到官方電視台主持Lee Parker中招！話說Parker周五如常去到訓練場直擊嚟緊英足盃第五圈作客狼隊嘅備戰情況，當佢一本正經對住鏡頭講嘢，旁邊突然殺出一個「黑影」，原來係雷斯撲出嚟將佢撻落地下，仲出動摔角界秘技迷魂鎖K.O.！最搞笑係隊友查洛巴即刻化身拳證，數三下證明Parker冇還擊之力，宣判雷斯勝出！
不過，領隊干地就講明雷斯喺呢場英足盃掛免戰牌，等佢安心治理輕微膝傷，至於出擊左閘馬高斯阿朗素亦會休息，泰利、尼敦阿基等將有機會上陣。