記者小G上日突然問左丁山：「雜誌隨刊附送所謂精品、紀念品，有冇政策㗎？」點解有此一問？小G解釋，今個星期四早上受人所托，晨早五點幾返工之時就到便利店買一本旅遊雜誌，佢嘅好友係紀念品粉絲，唔慣晨早起身，故此請返早班嘅記者G幫忙。小G去到便利店，不過係朝早五點幾，夥計話雜誌未送到，六點鐘，記者G再去同一便利店，夥計話「賣晒咯。」唔係啩，咁好賣？但逼於無奈，走去德輔道中一個報攤買，報攤阿婆又話賣晒，記者G更加條氣唔順，走上大道中另一個報攤，時維6時15分，報攤阿叔話：「攞咗一本咋，嗱，有紀念品送，每本賣58元！」嘩，足足比平時售價（12元）高出四十六蚊，其實即係紀念品嘅代價，紀念品並非隨刊附送，都唔知係用紀念品嚟促銷雜誌吖，還是用雜誌嚟促銷紀念品？
小G買完雜誌，方才明白「雜誌沽清」係一種非常表面嘅現象，感嘆現在乜都唔可以信表面，要周圍問清楚先至可以知道大概真相，「真真相」或者永遠只有決策人（如雜誌督印人）先至知道。現在時興流行一個詞，叫做post-truth（後真相），其實真相在絕大部份情形下不為人知，還講甚麼後真相，直情係自己呃自己。
記者G既然問到，左丁山就答：「我地係笨笨哋嘅一代，從來諗唔到隨雜誌附送紀念品時，可以猛加售價，20幾年前我地好天真，出雜誌，如有贈品附送，一定會加大，而不是收縮發行量，只係收平時價錢而不識臨時加價高三倍，所以次次送贈品都造到雜誌暢銷嘅效果，宣傳得好成功，但亦同時蝕銀蝕得入肉，因為贈品並無另外收錢吖嘛。而且嗰陣時更督促發行商阿強哥周圍叫報攤攞多啲，邊會俾報攤攞一份咁少㗎。」記者小G聽完都忍唔住笑：「你地在21世紀可能真係out晒咯」。講手法或者係out晒，但做生意嘅最高原則係不欺客，要做到童叟無欺，先可建立品牌聲譽，如果剩係識諗招式圖一時之快，賺到快錢就自以為傲，係好短視嘅啫。橋段有時而盡，無以為繼，如無商譽，點樣可以打持久戰呀。記者G聽完左丁山講古老嘢，講番一句：「你嗰代講天長地久，我呢代講曾經擁有，三個月就到H&M換新款，大家真係有代溝！」