奶媽林鄭月娥早前俾網民嘲諷抄得就抄，喺薯片叔叔曾俊華派老婆拍片大晒幸福之後，搵嚟參選至今極為低調嘅老公林兆波，寫咗封希望佢「為落實一國兩制作出貢獻」嘅「情書」，有網民同傳媒質疑兆波同李波一樣身不由己，俾人代寫呢封似聲明多過情書嘅信件。
噚日下晝奶媽透過競選辦澄清，話信件真係由林兆波所寫，強調由其他人草擬嘅講法絕無其事，同時對唔向當事人求證、純粹猜測或者惡意中傷嘅報道表示遺憾喎。
而八方噚日下晝，就喺灣仔天橋見到林兆波再次單拖出現，衣着風格依然反映佢對個人儀容不着意，同時見佢手持一支疑似洗衣液，唔知係咪幫連廁紙唔知去邊度買嘅奶媽入定貨？