民建聯星期一召開中委會，宣佈推薦該黨選委提名奶媽林鄭月娥做下屆特首後，噚日先公佈特首參選人民調，話喺召開中委會前6日（即係本月7至12日），訪問咗1,040人，當中三成七人覺得曾俊華較適合做特首，比得三成四嘅林鄭高；認為胡國興同葉劉淑儀適合嘅則各佔8%。
民記調查又發現，四成人認為林鄭較有能力做特首，超過三成人覺得曾俊華較有能力，覺得葉劉同胡國興較有能力嘅就分別佔8.5%同6.1%。
公佈民調嘅陳克勤話，曾俊華同林鄭喺合適度同能力上不相伯仲，但被問到民調結果會唔會影響民記取態時，佢就話中委會已經決定推薦林鄭，現時該黨4名立法會議員，包括主席李慧琼、梁志祥、張國鈞同黃定光都已經提名咗林鄭，其他議員就仲諗緊喎。