由同志組織「女同學社」舉辦嘅第二屆「香港同讀文化節」噚日開幕，主題係「對話 翻開酷兒世界 我們無所不談」，場內有售賣性別議題書本等攤位，又有座談會同「真人圖書館」，參觀人士可以近距離接觸性小眾。
促下屆特首關注性小眾
大會執行幹事郭可芹話呀，雖然近年多咗名人出櫃，公眾有更多渠道認識性小眾，但係形式都流於表面，仍然存在唔少誤解，「會以為出櫃嘅都係靚仔靚女，或者以為同志比較陽光嘅，但好多性小眾、同志喺性方面都有唔同需求」。郭可芹話，政府對性小眾一直甚少幫助，認為下屆特首應該更積極同性小眾溝通，以及落實《性傾向歧視條例》。
另外，文化節有以性為主題嘅工作坊，其中「時鐘走店」模擬到時鐘酒店開房，從中教育性知識。參加者先喺樓下接待處領取匙卡，再上樓「開房」，房間入面介紹男女性徵、性玩具、模擬性器官，甚至性交姿勢等。
工作坊負責人、網媒OpenRoom總編輯刁思正話，香港性教育形式沉悶，「但其實可以玩得有趣啲」，更安排咗唔少性玩具畀參加者觸摸，「甚至可以聞到不同嘅性事」。刁思正認為香港嘅性教育十分守舊，年輕人都唔知道乜嘢係性，「就算年輕人去學習性事，好多時候都係實踐嗰陣就會撞板，例如未婚懷孕等，（工作坊）就可以畀年輕人學習性」。
文化節由即日至2月19號，中午12點至夜晚8點，喺石硤尾賽馬會創意藝術中心中央庭園同L2平台舉行，免費入場。
李八方
