求驗客手記:《愛回家》定《真情》?紅魔雙巴鬥搶鏡

求驗客手記:
《愛回家》定《真情》?
紅魔雙巴鬥搶鏡

「紅魔鬼」曼聯周四喺奧脫福主場鬥法甲嘅聖伊天,上演歐霸盃32強首回合,就成為「雙巴」嘅英雄地,伊巴謙莫域加盟曼聯後首次連中三元,助紅魔鬼3:0大勝;保羅普巴就贏阿哥一仗,賽後連同阿媽大合照,好似拍《真情》咁,不過呢排曼聯順風順水,領隊摩連奴就叫球員要認真番啲。
曼聯下周日先作客布力般流浪,角逐英足盃16強,加上歐霸盃冠軍可以出戰來季歐聯,點都有啲動力,面對聖伊天就以接近最強陣容出戰,「雙巴」伊巴同保羅普巴,同埋桑馬達等打正選,只係門將用番羅美路。伊巴效力巴黎聖日耳門時期已經入聖伊天唔少波,今仗《愛回家》當然亦都好醒神,15分鐘主射罰球射地波,省中人牆改變方向後慢溜尾袋開紀錄。換邊後75分鐘佢再接應拉舒福特傳中攻入第二球,88分鐘再射入12碼,奠定3:0大勝;連埋之前喺法國比賽,伊巴對聖伊天14場已經累積17個入球,今次亦係呢位瑞典射手球員生涯第17次,亦係效力曼聯第一次帽子戲法。

前鋒伊巴謙莫域(紅衫)首次幫曼聯連中三元,球隊亦以3:0輕取聖伊天。
美聯社

堅尼狠批普巴溫情騷

保羅普巴呢場就冇入波,不過對佢就有另一個意義,因為佢面對效力聖伊天嘅哥哥費倫丁普巴,而普巴媽媽同埋另一位效力荷甲鹿特丹斯巴達嘅哥哥馬特斯波格巴,都有入場支持,媽媽Yeo仲自製一件一半曼聯一半聖伊天嘅波衫捧場。保羅普巴賽後就話自己可以喺正式比賽同哥哥交手,感覺好奇妙,呢啲機會唔係成日有,比贏波仲開心。不過曼聯名宿堅尼就狠批普巴呢個《真情》騷做得太過份,堅尼暗寸:「普巴兄弟呢幾日言論,應該多過我同兄弟幾年內嘅交談,或者呢個就係𠵱家年輕球員嘅專利。」

摩佬警告球員咪自滿

紅魔鬼連埋聯賽已經三連勝,晉級16強都應該好穩陣,不過曼聯領隊摩連奴仲係有啲不滿,特別係紅魔鬼嘅態度:「更衣室太嘈、太輕鬆、太開心,連我啲教練團都覺得球員熱身時態度唔夠積極,有啲球員冇喺比賽百分百專注,如果成日都係咁,比賽就會好危險。」正所謂驕兵必敗,曼聯真係唔好贏番幾場就衝昏頭腦。