曼聯繼續醒神贏波，另一支英超球隊熱刺就依然好頹，喺歐霸盃32強首回合作客真特雖然以強陣出擊照樣輸波，0:1敗走比利時。
領隊普捷天奴基本上已經排出最強陣容，哈利卡尼、迪利阿里同洛里斯等全部正選上陣，但俾真特前鋒佩比喺下半場入波奠勝贏1:0。禍不單行，前鋒哈利卡尼喺比賽度觸傷膝部，九成九唔會喺聽日對富咸場英足盃候命。一星期內連輸兩場，普捷天奴賽後話：「毫無疑問我哋𠵱家係處於低潮，到聽日英足盃，我會再重新整理吓陣容。」
迪斯高戴帽挫「黃潛艇」
另外幾支歐洲五大聯賽勁旅，周四齊齊喺作客情況下贏波。史浩克04作客3:0輕取PAOK；里昂作客阿爾克馬爾贏4:1，前鋒拿卡錫迪梅開二度；羅馬就更有霸氣，造訪維拉利爾有前鋒迪斯高連中三元，大勝4:0而回。