特首提名期開始之後，各個參選人開始四出見選委，到𠵱家都未夠票入閘嘅薯片叔叔曾俊華，依然好努力四處出動。
薯片叔叔噚日就喺facebook同Instagram貼文，話自己見選委之餘，亦藉機四圍搵好西食，好似前幾日佢去長沙灣，就去咗一間叫Ateen嘅素食社企餐廳，仲大讚味道唔錯呀。
撐弱勢支持社企
薯片話今年1月香港被評為亞洲10大「素食友善」城市之一，市民越嚟越關注素食同環境、健康、生活質素嘅關係。薯片到訪當日，餐廳坐滿食客，相當熱鬧，佢話Ateen主要聘用癌症同情緒病康復人士、單親人士等弱勢社群，為素食再加添一重意義，值得市民以身體力行方式去支持喎。
薯片叔叔認為，透過社企模式，政府可以推動更多元嘅商舖，突破一般市場限制。佢又藉機推銷政綱，話之前喺政綱提出未來會推動社企進一步發展，協助佢哋拓展業務，由宣傳到商業合作都全面成長，帶動城市發展，無論係消費者抑或待業人士，都會有更多選擇機會，希望可以為香港帶來百花齊放嘅商業環境喎。