特首跑馬仔搞咗咁耐，手中冇票嘅市民可能都睇到悶。最近有網民就整咗個叫「特首爭霸戰（Fighting CE）」嘅Android手機遊戲，畀大家剝花生之餘，仲透過玩遊戲嘲諷現時小圈子選舉嘅荒謬，希望玩家可以苦中作樂咁話。
由西環欽點角色
根據特首爭霸戰遊戲介紹，呢個遊戲嘅靈感來自八十年代經典拳擊計數機遊戲，要勝出就要成功出拳打倒所有特首候選人，同時避免對方攻擊，唔知打開拳嘅薯片叔叔曾俊華有冇着數呢？
遊戲設計亦相當抵死，除咗可以自選應戰角色，亦可透過「西環欽點幸運輪」，由西環幫你揀邊位人物出戰，都幾反映現時西環治港嘅荒謬之處。