舊年10月喺一片爭議聲中當選立法會主席嘅梁君彥，事隔4個月後，噚日喺立法會走廊正式「上位」！乜梁君彥唔係做咗主席好耐喇咩？八方講緊嘅其實係佢幅主席相呀！
話說立法會秘書處噚日喺立法會散會後，即刻派人喺大樓走廊一眾前主席相旁邊加裝梁君彥嘅相，過程由於要度位，所以幅相經歷「一上一落」先至成功掛上。原本準備離開立法會嘅梁君彥，喺傳媒要求下特登跑返轉頭睇下自己幅大相，笑稱梗係幅相入面靚仔啲，因為化咗妝，仲話自己後生時靚仔好多㖭。對於相中嘅佢瘦身唔少，梁君彥就笑笑口話：「我咁嘅身材，係咁上下啦！」然後就轉身離開。