周三另一場歐聯16強首回合賽事，皇家馬德里主場迎戰拿玻里，有驚無險先失一球下以3:1反勝對手，晉級形勢唔錯。拿玻里今場衰乜？可能係衰馬勒當拿。
拿玻里歷來兩次贏意甲冠軍，87同90年陣容都有呢位阿根廷名宿在陣，所以受推崇備至，球會仲喺歐聯賽前特登請埋老馬嚟到更衣室講話，激勵吓班球員。老馬一早就帶埋27歲未婚妻Rocio Oliva去馬德里，喺情人節高調放浸泡泡浴相放閃，但係又發生打記者同被警察問話事件。唔知拿玻里係咪受佢黑氣影響，對皇馬場波雖然由恩斯治尼先開紀錄，但皇馬由賓施馬、卻奧斯同卡斯米路各入一球，反勝3:1。
施丹話3:1未必晉級
皇馬喺首回合攞到兩球優勢，但對手始終有一個作客入球，加上皇馬歷來喺歐戰淘汰賽六次首回合主場贏3:1，竟然只得兩次晉到級，所以教練施丹話晉級八強仲未穩陣：「今場波賽果合理，但兩隊都仲有晉級機會。」另外，皇馬中堅沙治奧拉莫斯喺比賽中受傷，下場西甲上陣成疑。