有「新西環契仔」之稱的建制派議員何君堯，噚日喺立法會辦公室同記者拜年兼茶敍，現時議辦位處立法會六樓的何君堯話，當初秘書處畀佢揀十樓、八樓同六樓，佢知道十樓有熱血公民鄭松泰進駐後，話為免平日同泰博有爭執，所以唔揀，「我同佢（泰博）保持安全距離好啲」。
至於八樓，何君堯就話，唔太鍾意個辦公室位置，所以最終揀咗六樓，與同層的民記做鄰居。
承繼咗民記前主席譚耀宗間房的何君堯話「譚耀宗坐過，特別好風水」，話譚耀宗議員任內表現好好，希望「好嘅嘢就要延續」喎。
何君堯又話，西環早前打電話問過佢提名特首立場，希望作出「協調」，但對方一聽到佢話會提名林鄭，知道唔使再講咁多，即刻趕住收線，只回應話「遲啲再聯絡」喎。