國際特赦組織香港分會喺中環開臨時書店，有過千本由藝術家同義工特別設計嘅書，啲書有幾特別？原來組織邀請咗藝術家同義工，將收集返嚟嘅書「加工」，有啲書內頁被撕爛，有啲就用筆刪走晒啲字，用唔同方式表達香港言論自由收窄同自我審查嘅問題。其中一本書入面嘅所有字都遮住晒！組織話，如果公眾失去言論自由，市民將來睇到嘅書就會好似呢本書一樣。書店嘅書全部賣＄27（圖），目的係想市民關注《基本法》第27條保障言論自由。
國際特赦組織香港分會總幹事區美寶話，近年香港言論自由同新聞自由越嚟越唔理想。《明報》前總編輯劉進圖被襲同銅鑼灣書店事件，都反映出香港嘅言論自由正遇到挑戰。組織希望用藝術鼓勵市民去捍衞言論自由。
組織仲會喺2月16至26日首次舉辦藝術節，展出本地同世界各地藝術家嘅作品同舉辦工作坊。臨時書店由噚日起一連兩日，早上10時至下午5時喺中環砵典乍街36號樂慶里營業。