阿仙奴喺周三歐聯16強首回合作客輸畀拜仁慕尼黑1:5，相信唔少廠迷睇到火都嚟，但如果你覺得自己太有惻隱之心或者已經欲哭無淚，不如等呢位球迷幫你出出氣！
近期旗幟鮮明「Anyone but Wenger」嘅阿仙奴球迷頻道ArsenalFanTV，喺安聯場外訪問咗10幾位球迷，話就話立場行先梗係個個都反雲格，但睇吓呢位球迷一輪嘴咁激動，真係好難扮出嚟：「之前有人話我影衰隊波，但影衰隊波嗰個唔係我，而係球場裏面嗰件垃圾。兩年兩鬥拜仁夾埋輸足2:10呀，你話返主場會反勝？我哋連李斯特城都贏唔到，仲話贏拜仁？儍的嗎？我忍夠呢pat屎啦，唔該雲格快啲走人。上次我咪同你講咗，作客拜仁一定丟晒架，你見到啦！邊鬼個排陣？邊鬼個執條防線？連英冠都不如啦！踢到咁會出到線？你咪癲啦！我的天啊，你知唔知我嚟呢度有幾煩，買飛又麻鬼煩，而家真係冇眼睇。廠迷唔應該承受呢啲表現，大家唔該擘大你哋雙眼，雲格已經玩完啦，佢冇嘢可以再貢獻球隊。呢支球隊冇尊嚴、冇熱情可言，根本就係一個笑話。每年都係一樣劇本，呢隊波已經玩完啦！雲格根本成條恐龍咁，已經絕鬼晒種！」